वार्षिक १४ हजार नेपाली जुवा खेल्न सिंगापुर

सरकारले नेपाली नागरिकलाई क्यासिनो प्रवेशमा कडाइ गरिरहेकै बेला सिंगापुरस्थित मेरिना बे स्यान्ड्स क्यासिनोमा गत वर्ष १४ हजारभन्दा बढी नेपालीले जुवा खेलेको खुलासा भएको छ । नेपाली क्यासिनो कार्यविधि तयार गर्ने सिलसिलामा अध्ययनका लागि सिंगापुर पुगेको पर्यटन तथा नागरिक उड्डयन मन्त्रालयको सहसचिवस्तरीय टोलीले यो जानकारी दिएको छ ।
सन् २०१० मा मात्रै यो क्यासिनोमा १४ हजार ३ सय ३ नेपाली प्रवेश गरेको तथ्यांक क्यासिनोे व्यवस्थापनले आधिकारिक रूपमा नेपाली टोलीलाई दिएको हो । मन्त्रालयका सहसचिव एवं प्रवक्ता लक्ष्मण भट्टराईले सिंगापुर, मलेसिया, गोवा र सिक्किमलगायत स्थानका क्यासिनोमा नेपाली बढी जुवा खेल्न जाने गरेको बताए ।भट्टराईकै नेतृत्वमा तीन सदस्यीय टोली हालै सिंगापुरका केही क्यासिनोको अध्ययन गरेर फर्किएको छ । “सिंगापुरको एउटै क्यासिनोमा यतिका संख्यामा नेपालीहरू जुवा खेल्न जानु अचम्मलाग्दो छ, कतिपय नेपालीहरू कति सम्पन्न छन् भन्ने कुरा पनि यसैबाट स्पष्ट हुन्छ,” उनले भने ।गत वर्षको जनवरीमा १ हजार ६ सय १९ नेपाली मेरिना क्यासिनोमा पुगेको तथ्यांक छ । फेब्रुअरीदेखि डिसेम्बरसम्मका प्रत्येक महिनामा १ हजारभन्दा बढी नेपाली त्यहाँ पुगेका छन् । सहसचिव भट्टराईका अनुसार अघिल्लो वर्ष (सन् २००९) मा यो क्यासिनो पुग्ने नेपालीको संख्या १५ हजारभन्दा बढी थियो । मेरिना बे स्यान्ड्स सिंगापुरको प्रसिद्ध होटलमध्येको एक हो । साततारे उक्त होटलको क्यासिनो १५ हजार वर्गमिटर क्षेत्रफलमा फैलिएको छ ।

प्रवक्ता भट्टराईका अनुसार त्यहाँका क्यासिनोमा स्वदेशी तथा विदेशी दुवैखाले पर्यटकलाई जुवा खेल्न अनुमति छ । स्वदेशी तथा विदेशी पर्यटकका लागि क्यासिनो प्रवेशद्वार तथा खेल्ने क्षे समेत फरक–फरक हुने गरेको जानकारी उनले दिए ।

स्वदेशीलाई पनि मापदण्ड बनाएर क्यासिनो प्रवेशको अनुमति दिने तयारीमा रहेको पर्यटन मन्त्रालय यो अध्ययनबाट उत्साहित छ । “क्यासिनो तारे होटलको विशेषता तथा सुविधा भएकाले निश्चित दायरा बनाई स्वदेशी तथा विदेशीलाई जुवा खेल्ने व्यवस्था हुनुपर्छ, यसो नभए मुलुकको अर्बौं रकम बिदेसिन्छ,” भट्टराईले टिप्पणी गरे ।

क्यासिनो धाउनेहरू प्रायः उच्च आर्थिकस्तर भएका मानिस हुने भएकाले प्रवेश शुल्क बढाएर कडाइ गरिए रोयल्टी बढी उठ्ने उनको ठहर छ । नेपालसँग सीमा जोडिएको सिक्किममा जुवा खेल्न जाने नेपालीको ठूलै जमात रहेको जानकारी पनि दिए ।

नजिक हवाई दूरीमा रहेका, बैंकक, गोवा, मलेसियालगायतका सहर नेपालीले बढी धाउने क्षेत्रमा पर्छन् । मेरिना बे स्यान्ड्स क्यासिनो प्रवेश पासका लागि मात्रै १ हजार डलर प्रवेश शुल्क तिर्नुपर्छ । नेपाली क्यासिनो प्रवेशका लागि ५ हजार रुपैयाँ शुल्क लाग्ने प्रस्तावित गरिएको छ ।

सन् २००५ मा स्थापना भएको सिंगापुरको यो क्यासिनोका सबैभन्दा बढी ग्राहक एसियाका छन् । २०१० भित्र एसियाबाट ८६ लाख, अमेरिकाका ५ लाख, युरोपबाट १३ लाख र अफ्रिकाका ७५ हजारभन्दा बढी पर्यटकले यो क्यासिनो प्रवेश गरेको तथ्यांक छ ।

Posted in: